இன்னும் செய்ய வேண்டியது நிறைய இருக்கிறது

இன்னும் செய்ய வேண்டியது நிறைய இருக்கிறது

எனக்கு உங்களால் உதவ முடியாது

சொல்லப் போனால்

என்னால் கூட எனக்கு உதவ முடியாது

என் அமைப்பு அப்படி இருக்கிறது

நீங்கள் உதவவில்லை என்று வருந்தப்பட மாட்டேன்

உங்கள் உதவிகள் என்னைச் சேரவில்லை என்று

உலகிற்குச் சொல்லவும் மாட்டேன்

உண்மையைச் சொல்லப் போனால்

எந்த உதவிகள் எனக்கு உதவக் கூடும்

யார் செய்யும் உதவிகள் எனக்குத் துணை நிற்கக் கூடும்

என்று எதுவும் எனக்குத் தெரியாது

உபத்திரவங்கள் கூட அப்படித்தான்

எது என்னை உபத்திரவம் செய்யும்

என்று எனக்கு எதுவும் தெரியாது

உதவிகள் குறித்தோ உபத்திரவங்கள் குறித்தோ

நான் எதையும் நினைத்துக் கொள்வதில்லை

வாழ்க்கையில் இரண்டும் இருக்கும் அல்லது

இல்லாமலும் இருக்கும்

இருப்பதற்கு மகிழ்வதோ

இல்லாமல் போவதற்கு வருந்துவதோ

எதுவும் இல்லை வாழ்க்கையில்

வாழ்க்கைப் பயணத்தில் எதுவும் நடக்கலாம்

அப்படித்தான் நடந்து கொண்டிருக்கிறது

உதவிக்கு நன்றி சொல்லவில்லை என்று நினைக்காதீர்கள்

உபத்திரவத்திற்காகக் கோபப்படவில்லை என்று நினைக்காதீர்கள்

ஒவ்வொருவரும் ஒவ்வொருவருக்காக

இரண்டிலொன்றைச் செய்ய வேண்டியிருக்கிறோம்

எதைச் செய்யப் போகிறோம்

எதைச் செய்யாமல் விடப் போகிறோம் என்பது

உங்களுக்கும் தெரியாது என்பதை நான் அறிவேன்

அறியாமல்தான் செய்து கொண்டிருக்கிறோம்

அறியும் போது எல்லாம் நடந்து முடிந்திருக்கும்

வருத்தப்படுவதற்கு எதுவுமில்லை

போய் வாருங்கள் மனிதர்களே

இந்தப் பூமியில் இன்னும் நீங்கள் செய்ய வேண்டியது

நிறைய இருக்கிறது

*****