எதிரிகளுக்கான ஆலோசனைகளைத் தயார் செய்யுங்கள்
நான் ஒவ்வொரு முறை பதறும் போதும்
என் எதிரிகள் அதிக ஆதாயங்கள் அடைகிறார்கள்
என்னைப் பார்ப்பவர்கள் எல்லாம்
பதற்றத்தைக் குறைக்க சொல்கிறார்கள்
நான் என்ன செய்வேன் சொல்லுங்கள்
என் எதிரிகளே
என்னால் ஆதாயம் அடைவதை குறையுங்கள் என்கிறேன்
யார் சொல்வதைக் கேட்கும்
மனநிலையில் நானும் இல்லை
நான் சொல்வதைக் கேட்கும்
மனநிலையில் என் எதிரிகளும் இல்லை
நான் பதற்றம் அடைந்து கொண்டிருக்கிறேன்
எதிரிகள் பலன் அடைந்து கொண்டிருக்கிறார்கள்
என்றாவது ஒரு நாள்
பதற்றங்கள் பழகிப் போகாமலா போய் விடும்
அப்போது என் எதிரிகளுக்கான
ஆலோசனைகளை இப்போதே யோசித்துக் கொள்ளுங்கள்
என் பிரியமான நண்பர்களே
*****
No comments:
Post a Comment