இருப்பிலும் இன்மையிலும் கலந்திருக்கும் ஒன்று

இருப்பிலும் இன்மையிலும் கலந்திருக்கும் ஒன்று

ஒரு பிரச்சனையை வெளியில் சொல்கையில்

இன்னொரு பிரச்சனையைக் கொண்டு வருகிறது

சொல்லாமல் போகையில்

கால வெளியில் மறந்து போகிறது

சில பிரச்சனைகளை வெளியில் சொல்லி

சில பிரச்சனைகளை எதிர்கொள்ளவும் வேண்டியிருக்கிறது

வெளியில் சொல்ல முடியாமல்

மனப்புழுக்கத்தையும் அனுபவிக்கவும் வேண்டியிருக்கிறது

அனுபவச் செரிமானத்திற்குப் பின்

மரவட்டைகள் போல ஊர்ந்து போகும் பிரச்சனைகளுக்கு

ஏன் அருவருப்புக் கொள்ள வேண்டியிருக்கிறது

ஒரு மரவட்டை உன்மேல் ஊர்ந்து போகாத அளவிற்கு

விலகிப் போய்க் கொண்டேயிரு என்று

உள்ளுக்குள் ஒரு குரல் ஒலிக்கத் தொடங்குகிறது

அதுதான் முடிவோ என மருளுகையில்

குரலுக்கு அடங்கிப் போவதிலும் ஒரு பிரச்சனை இருக்கிறது

அடங்காமல் போவதிலும் ஒரு பிரச்சனை இருக்கிறது

இருப்பதில் ஒவ்வொன்றிலும் ஒவ்வொரு பிரச்சனை இருக்கிறது

பிரச்சனையின்மை எதில் இருக்கிறது

*****