கடந்து போகும் வாழ்க்கைச் சாலை

கடந்து போகும் வாழ்க்கைச் சாலை

ஆடைகள் ஒரு பொருட்டில்லை

வயிற்றுப்பாடும் முக்கியமில்லை

கோடை குளிர் மழை

எது குறித்த எந்தப் பிரக்ஞையுமில்லை

ஒரு கோப்பைத் தேநீரோ

ஒரு பொட்டல உண்பண்டமோ கிட்டினால்

கடவுளரின் வரம் கிட்டியது போன்ற பேரானந்தம்

எதுவும் கிட்டாதாயினும்

தெருநாயைக் கட்டியபடி உறங்குவதில் பரம சந்தோசம்

மனிதர்கள் கொடுக்க தவறிய

மகிழ்ச்சியை

மனிதர்களினின்று கழன்று எடுத்துக் கொள்ளும்

மனம் பிறழ்ந்த மனிதர்களில் ஒருவரையேனும்

ஒவ்வொரு ஊரிலும் தரிசித்தபடி

கடந்து போய்க் கொண்டிருக்கிறது வாழ்க்கைச் சாலை

*****