அவரவர் வாழ்க்கை அவரவர்க்குரியது

அவரவர் வாழ்க்கை அவரவர்க்குரியது

சோதனைகள்தான் களம்

வடிவங்கள் மாறிக் கொண்டிருக்கின்றன

ஊர்தோறும் குடியேறி பல நாடகங்களைப் பாருங்கள்

உலகமே நாடகமேடை எனும் போது

ஒவ்வொரு ஊரும் ஒவ்வொரு நாடகக் காட்சிகள்

ஒரு நல்ல நாடகம் உங்களை மாற்றி விடலாம்

மோசமான நாடகமும் உங்களை மாற்றாமலா போய் விடும்

உங்கள் நண்பர்களோ பகைவர்களோ

ஏதோ ஒரு பக்கத்தில்

ஏன் உங்கள் அருகில் கூட பெருகிக் கொண்டிருக்கலாம்

ஒரே மாதிரியாக வாழ்வதின் அலுப்பிலோ சலிப்பிலோ

நீங்கள் தற்கொலை பற்றிக் கூட சிந்திக்கலாம்

தனியாக வாழ்வது பொருத்தமெனவோ

துணையோடு வாழ்வது உசிதமெனவோ

நீங்கள் ஒரு முடிவுக்கு வரலாம்

எது எப்படியோ

அது உங்களுக்குப் பிடித்தமான வாழ்க்கை

அதை அப்படியே வாழுங்கள்

உங்களுக்குப் பிடித்தமான வாழ்க்கை

மற்றவர்களுக்குப் பிடித்தமான வாழ்க்கையாக இருக்கும்

என்று பிரசங்கிக்காதீர்கள்

அவரவர்களுக்கும் பிடித்தமான வாழ்க்கையை

அவரவர்களும் கண்டு கொள்வார்கள்

நீங்கள் கொஞ்சம் தலையிடாமல் ஒதுங்கிக் கொள்ளுங்கள்

அத்துடன் கருத்து கூறாமலும் ஒதுங்கிக் கொள்ளுங்கள்

*****