விலகிச் சேர்ந்திருக்கும் அபூர்வங்கள்

விலகிச் சேர்ந்திருக்கும் அபூர்வங்கள்

அன்றொரு நாள் சந்தித்த போது

எதேச்சையாகக் கேட்டாய்

பிறகு எப்போதேனும் சந்தித்தோமா

வேறு ஏதேனும் விவரங்கள் தெரியுமோ

அலைபேசி எண் தந்தால் பேசுவாயோ

ஒரு முறை சென்று பார்க்காலாமோ

ஒரு முறை பிரிந்த உறவை

எப்படியெல்லாமோ ஒட்ட வைக்க நீயும் முயற்சித்தாய்

ஒட்டியிருப்பதென்றால்

எப்போதோ ஒட்டியிருக்க வேண்டும்

திடீரென்று ஒரு முற்றுப்புள்ளி

அப்படி விழும் என்று யார் எதிர்பார்த்தார்கள்

விழுந்தது விழுந்து விட்டது

அப்படியே இருந்து விட்டுப் போகட்டும்

அதற்கு மேல் எனக்கேதும் தெரியவில்லை

தெரிந்து கொள்ளவும் விரும்பவில்லை

உறவோடிருந்த நாட்களின் பசுமை

எப்போதும் கருகி விடாது என்பதை மட்டும் சொல்

அத்துடன்

புதிய தளிர்கள் துளிர்க்காது என்பதையும் சேர்த்துச் சொல்

விலகியபடி சேர்ந்திருக்கும் அபூர்வங்களுடனே

பூமி எப்போதும் சுழன்று கொண்டிருக்கட்டும்

*****