உங்கள் அர்த்தங்களில் வாழும் நான்

உங்கள் அர்த்தங்களில் வாழும் நான்

எனக்கு உங்களிடம்

எதுவும் சொல்லப் பிடிக்கவில்லை

நான் ஓர் அர்த்தத்தில் சொல்கிறேன்

நீங்கள் ஓர் அர்த்தத்தில் புரிந்து கொள்கிறீர்கள்

உங்கள் அர்த்தத்தை வைத்துக் கொண்டு

என் மீது அவதூறு பரப்புகிறீர்கள்

உங்கள் அவதூறுகளுக்கு எதிரான

என் விளக்கங்களை ஏற்க மறுக்கிறீர்கள்

எதுவும் சொல்லாமல் அமைதி காப்பது

உங்களைப் பிரதிவினையாற்ற விடாது செய்து விடுமென

அதுவும் கூடாதென்கிறீர்கள்

உங்கள் அர்த்தங்களை

ஓர் அடிமை போல ஏற்க வேண்டுமென்கிறீர்கள்

என்னை ஏதாவது சொல்ல வைத்து

அதில் என்னை உங்களின் அடிமையாக்குவதில்

அப்படியொரு பேரானந்தம்

அதற்கெனவே என் அர்த்தங்களோடு வாழ முடியாத

வன்முறையைத் தயார் நிலையில் வைக்கிறீர்கள்

உங்கள் அர்த்தப்பாடுகளுக்கு ஏற்ப

என்னை மாற்றியமைத்துக் கொள்கிறீர்கள்

என் அர்த்தங்களைக் கொன்று

உங்கள் அர்த்தங்களின் வன்புணர்வில்

பழக்கி வைக்கிறீர்கள் உங்களுக்கான என் வாழ்க்கையை

*****