ஜென்மாந்திரக் கதைகள்

ஜென்மாந்திரக் கதைகள்

போன ஜென்மத்து நினைவுகளோடு

இந்த ஜென்மத்தில் இருக்கும்

ஒருவர் உங்கள் கண்களில் பட்டால்

நீங்கள் என்ன செய்வீர்கள்

எனக்கு அவரிடம் கேட்க

நிறைய கேள்விகள் இருந்தன போலத் தோன்றி

இப்போது ஏதும் இல்லை என்பது போலத் தோன்றுகிறது

போன ஜென்மத்திற்கான அனைத்தும்

வரலாறாக எழுதி வைக்கப்பட்ட பின்பு

அவர் என்ன பெரியதாகப் பிதற்றப் போகிறார்

மறுஜென்மம் குறித்து அவர் ஏதோனும் சொன்னால்

உபயோகமாக இருக்கும் என்றாலும்

நானென்ன பெரிதாக மாற்றி விட முடியும்

இந்த ஜென்மத்திற்குரியதைச் சொல்பவர்கள்

யார்தான் இருக்கிறார்கள்

ஒவ்வொரு ஜென்மத்திலும் நடக்கும்

அக்கிரமங்களுக்கு அந்த ஜென்மத்தில்

பரிகாரம் கிடைக்காத போது

 அதைப் பிறிதொரு ஜென்மத்தில்

பிதற்றித்தான் என்ன பிதற்றாமல் இருந்ததுதான் என்ன

நான் போன ஜென்மத்துக் கதைகளை

மூட்டை கட்டி வைக்கச் சொல்கிறேன்

மறுஜென்மத்துக் கதைகளை

நிர்தாட்சண்மாய் மறுதலிக்க விரும்புகிறேன்

இந்த ஜென்மத்துக் கதைகளை மட்டும்

எழுதிக் கொண்டிருக்கிறேன்

எழுதிக் கொண்டே இருக்க விரும்புகிறேன்

*****