எரிமலையினின்று உருள்வது

எரிமலையினின்று உருள்வது

நடுநிசி நேரத்தில் கதவு உடைபடுவது போல

உறங்கா ஓர் இரவில் விழிப்பு தட்டுகிறது

எத்தனை இரவுகளில் நிம்மதியாக உறங்கியிருப்பேன்

பிரக்ஞையோடு இருப்பதன் விபரீதம்

கனவுகளில் பிரக்ஞையற்று போவதின் நன்மை

இரவில் திறந்து கொள்ளும் விழிகளில் உருள்கிறது

உறக்கம் வராதா எனக் காத்திருக்கையில்

உறக்கத்தின் மீது ஒரு ஆகப் பெரும் மரியாதை வருகிறது

கூடவே உறங்க விடாத மனதின் மீது கோபமும்

சிறு குழந்தையின் கேவலைப் போல இறைஞ்சுகிறது

எத்தனையோ இரவுகள்

உறங்கிக் கழித்தவை என்று

எவ்வளவு எளிதாய் நினைத்திருந்திருக்கிறேன்

உறங்காமல் போயிருக்கும்

ஒவ்வொரு இரவின் நரகமும்

காது மடல் விளிம்பில் சாணை தீட்டுகின்றன

அப்போதெல்லாம் எப்படி உறங்கினேன்

இப்போது எப்படி உறங்கப் போகிறேன்

எதுவும் தெரியாது

ஆனால் உறங்க வேண்டும்

எப்படியோ உறங்கினால் போதும்

இந்த இரவும் கடந்து போகும்தான்

உறங்காமல் கடந்து போவது

தீக்குழம்பைக் கக்கும்

எரிமலையினின்று உருள்வது போலிருக்கிறது

*****