ஒவ்வொருவருக்கும் அறிவிப்பு உண்டு

ஒவ்வொருவருக்கும் அறிவிப்பு உண்டு

மரண அறிவிப்பைச் செய்தபடி

ஆட்டோ விரைந்து கொண்டிருக்கிறது

ஆட்டோவில்ருந்து ஒலிக்கப்பட்ட

ஊரின் பெயரோ

தெருவின் பெயரோ

நபரின் பெயரோ

இன்னார் இன்னாருக்கு உறவின் தொடர்புகளோ

நினைவுக்கு வர மறுத்து

அடிமனதில் ஊசலாடிக் கொண்டிருக்கிறது

அறியாத ஒருவரின் மரணம்

காற்றில்கலந்த சிற்றோசைப் போல ஆகி விடுகிறது

ஒருவர் மரணித்து விட்டார் என்ற துக்கம்

கடைவிழியில் ஒரு துளிக் கண்ணீரை உருட்டி விட்டுப் போகிறது

இப்போதெல்லாம் ஆம்புலன்ஸைக் கடப்பதைப் போல

ஆட்டோக்களைக் கடக்கும் போதும் தோன்றுகிறது

ஒவ்வொரு மனிதரும் சாக வேண்டியவர்கள்தான்

ஒவ்வொரு மனிதருக்கும் மரண அறிவிப்பைச் செய்ய

ஒரு ஆட்டோ தெருவெங்கும் ஓடிக் கொண்டிருக்கிறது

*****