அள்ளிக் கொள்ள ஆயிரம் வழித்துணைகள்

அள்ளிக் கொள்ள ஆயிரம் வழித்துணைகள்

எல்லாம் கொடுத்த பிறகு

என்னத்தை அள்ளிக் கொண்டு போகிறோம்

என்று எவ்வளவு தத்துவார்த்தமாகச் சொல்கிறார்

அப்படியா அள்ளிக் கொண்டதை

அள்ளி எடுத்து வை என்றால்

லக லகவென்று சிரிப்பென்றால் அப்படி ஒரு சிரிப்பு

கொடுப்பவன் மனதைத்  தளர விட்டு விடக் கூடாது பாருங்கள்

அதற்காக இப்படி ஒரு பேச்சு ஏற்பாடாம்

மற்றபடி என்ன இருக்கிறது

யார் எதை அள்ளிக் கொண்டு போகப் போகிறார்கள்

முடிந்த வரை ஏமாற்றிப் பறித்தாலும் பணக்காரர்தான்

கொள்ளையடித்தாலும் அது திறமைதான்

ஊரைச் சுரண்டினாலும் அது சாமர்த்தியம்தான்

அள்ள முடியாதவர்கள் ஆயிரம் சொல்வார்கள்

அள்ளும் கலை அவரவர் அறிந்து கொள்வது

அறிந்தவர்கள் கையில் பொன் அறியாதவர்கள் வாயில் மண்

அள்ளிக் கொண்டு போக முடியாது என்று தெரிந்தாலும்

அடித்துப் பிடுங்காமல் இருக்க முடியுமா

அவரவர் பிணமாகும் வரை

அங்கங்கு அள்ளிக் கொண்டிருக்க வேண்டியதுதான்

ஆற்று மணல் தாது மணல் குளத்து மண் சிவப்பு மண் என்று

கிடைப்பதை அள்ளிக் கொண்டிருக்க வேண்டியதுதான்

அள்ள எதுவும் கிடைக்காத போது

தளர்ந்து விடக் கூடாது

நான்கு பேரைச் சேர்த்துக் கொண்டு

தலைவராகிக் கொள்ள வேண்டும்

*****