இரண்டாம் உலகின் நடிப்பின் கால கட்டம்

இரண்டாம் உலகின் நடிப்பின் கால கட்டம்

நான் அப்படியல்ல

அப்படித்தான் நடிக்க வேண்டியிருந்தது

நடிப்புக்கு நல்ல வரவேற்பு கிடைக்கிறது

நிஜத்திற்கு விமர்சனம்தான் மிஞ்சுகிறது

என் மீது சுமத்தப்படும் குற்றச்சாட்டுகள் அனைத்தும்

நான் சரியாக நடிக்கவில்லை என்பதற்கான பிரதிவினைகள்

என் முகமூடிக்கு இருக்கும் மதிப்பு

எனக்கில்லை என்பதால்

எந்நேரமும் முகமூடி அணிந்து திரிகிறேன்

என்னை நான் பார்க்க வேண்டும் என்று நினைக்கும் போது

யாரும் அறியாமல் வெகு ரகசியமாய்

என் அலங்காரம் கலைத்து வேடம் கலைத்து

என்னை நானே பார்த்துக் கொள்கிறேன்

என்னை நான் பார்த்துக் கொள்ளும்

அந்தச் சில நிமிடங்களில்

என்னையும் அறியாமல் விசும்புகிறேன்

என்னைத் தொலைத்து விட்டு

எனக்காக நான் எதைத் தேடிக் கொண்டிருக்கிறேன்

நீங்கள் சந்தோசமாய் இருப்பதற்காக

நான் நடித்துக் கொண்டிருக்கும் வாழ்க்கையில்

நான் சந்தோசமாக இல்லை என்று உரக்கச் சொல்ல விரும்புகிறேன் 

அதனாலென்ன

உங்களுக்காக நீங்கள் ஆனந்தமாக இருப்பதைப்

பொறாமையோடு பார்ப்பதுதான் இந்த உலகம் என்கிறீர்கள்

நான் என் சந்தோஷத்தைச் சுருட்டிக் கொண்டு

உங்களுக்காகச் சந்தோசமாக இருப்பதாக நடிக்கத் தொடங்குகிறேன்

*****