மரியாதை தெரிந்த மேசை

மரியாதை தெரிந்த மேசை

ரொம்ப நாளாகத் தேடிக் கொண்டிருந்த மேசை

தமிழின் ஆஸ்தான எழுத்தாளர்

இதோ இங்கே நின்று கொண்டிருக்கும் மேசையில்

பற்பல எழுதியிருக்கிறார்

எழுதியதற்கான வெகுமானங்களை

மேசை டிராயரில் வைத்துப் பூட்டியிருக்கிறார்

எழுத்தாளர் மரித்த பின் மதிப்பிழந்த மேசை

கடை முதலாளி ஒருவருக்குக்

கணக்கெழுதும் மேசையாகவும் போயிருக்கிறது

அதி நவீன அலங்கார மேசைகள் வந்த பிறகு

ஓரங்கட்டப்பட்ட மேசை

பேரத்திற்கு விற்கப்பட்டு ஏலத்திற்கு வந்த போது

என் வீட்டிற்கு வந்தது

வருத்தம் ஏதுமில்லாமல்

எண்ணையும் எழுத்தையும் பார்த்த மேசை

அத்தனை பழைய பொருட்களைச் சுமந்தபடி

மரியாதை நிமித்தம் நின்று கொண்டிருக்கிறது

எனக்குப் பாவமாய்த் தோன்றும் பொழுதுகளில்

உட்கார் என்கிறேன்

மரியாதை தெரிந்த மேசை

உட்காராமல் நின்று கொண்டே இருக்கிறது

*****