சுதந்திர மிடுக்குடன் பார்த்தல்

சுதந்திர மிடுக்குடன் பார்த்தல்

பெண்களுக்கு எங்கே சுதந்திரம் இருக்கிறது சொல்லுங்கள் என்று சொல்லிவிட்டுத் தன்னை ஒரு பெண்ணியவாதி என்று அறிமுகப்படுத்திக் கொண்டார் அவர்.

மாலை அவர் வீட்டுக்குச் சென்றேன்.

அவர் கணவர் வீட்டு வேலைகளை எல்லாம் பார்த்து வைத்திருந்தார். தேநீர் போட்டுக் கொண்டு வந்து கொடுத்தார்.

கொஞ்ச நேரம் பேசிக் கொண்டிருந்தோம்.

எங்கள் பேச்சு எங்களுக்கே சலித்துப் போனது போல (போர் அடிப்பது போல) இருந்தது.

அவர் (பெண்ணியவாதி) நெடுந்தொடர்களைப் பார்க்க ஆரம்பித்தார். அவரது கணவரும் தேமேன அவர் பார்ப்பதையேப் பார்த்துக் கொண்டிருந்தார். நானும் அப்படியே பார்த்துக் கொண்டிருந்தேன்.

ஒரு கட்டத்திற்கு மேல் விடைபெற்றுக் கொண்டு வெளியேறினால் தேவலாம் போலத் தோன்றியது.

நான் விடைபெற்றுக் கொள்ள நினைத்த போது அவர் சொன்னார், “இந்த வீட்டில் ஒரு கோலம் போடக் கூட எனக்குச் சுதந்திரம் இல்லை”

அப்போது அவர் கணவர் அவ்வளவு மிடுக்குடன் என்னைப் பார்ப்பார் என்று நான் எதிர்பார்க்கவில்லை.

*****