பலமுறை நிறுத்திப் பழகுதலும் ஆரம்பித்துப் பழகுதலும்

பலமுறை நிறுத்திப் பழகுதலும் ஆரம்பித்துப் பழகுதலும்

ஒரு முறை குடித்தால் என்ன

ஒரு முறை புகை பிடித்தால் என்ன

ஒரு முறை கஞ்சா அடித்தால் என்ன

ஒரு முறை ஐட்டத்திடம் சென்று வந்தால் என்ன

எல்லாம் ஒரு முறைதான்

எல்லாம் ஒரு முறை பழகி

ஒரு முறை நிறுத்தி விட முடியுமா என்ன

நடுத்தெரு நாராயணன்

நூற்றியோரு முறை நிறுத்தியிருக்கிறான் குடிப்பதை

புதுத்தெரு புகழேந்தி

நாற்பத்தேழு முறை புகைப்பதை நிறுத்தியதற்கு

கணக்கு வைத்திருக்கிறான்

சாமி ஊர்வலம் வரும் நாட்களில் மட்டும்

கஞ்சா அடிப்பதை நிறுத்தி விடுவதாக

கடைத்தெரு கண்டியப்பன் சொல்கிறான்

மாலை போடும் மாதங்களில்

மனைவியுடன் கூட சம்போகம் இல்லை என்கிறான்

நாணயக்காரத் தெரு நாடிமுத்து

ஆரம்பித்தால் நிறுத்துவது கடினம் என்கிறார்கள்

எனக்கென்னவோ

நடைபயிற்சியும் புத்தகம் படிப்பதும்

ஆரம்பித்து ஆரம்பித்து நின்று போகிறது

நாராயணனிடமும் புகழேந்தியிடமும்

கண்டியப்பனிடமும் நாடிமுத்துவிடமும் கேட்டால்

ஒரு முறை செய்து பார்க்காமல்

எதையும் சொல்ல முடியாது என்கிறார்கள்

*****