வாழ்க்கை பல்லாங்குழியின் குழிகள்

வாழ்க்கை பல்லாங்குழியின் குழிகள்

குழியில் தள்ளி விடுவது ஒரு விளையாட்டு

தள்ளி விடும் போது

நல்ல குழியாகப் பார்த்துத் தள்ளி விடுங்கள்

விழுந்தவர் உறங்கி விட்டால்

நல்ல தூக்கம் வர வேண்டும் அல்லவா

குழிகளைச் சாதாரணமாக நினைத்து விடாதீர்கள்

போர்க்காலங்களில் பதுங்குக்குழிகள்தான் பாதுகாப்பு

குழிகளை வைத்து விளையாடும் பல்லாங்குழி

வாழ்க்கைக்கான குழி விளையாட்டிற்கான பயிற்சிக் களம்

சாலையிலும் நல்ல குழிகள் உள்ளன

அவை தள்ளி விடுவதற்கல்ல

அவர்களாகச் சென்று அவர்களாக விழுவதற்கு

கேபிள் பதிக்க குழாய் பதிக்க

பாதாள சாக்கடைக்குத் தோண்டிய குழிகளும் இருக்கும்

அவை குழியில் விழுந்து எழுந்து

பழக்கப்படுவதற்காக வெட்டப்படுபவை

யாரும் உங்களைக் குழியில் தள்ளவில்லை

என்று பெருமை கொள்ள வேண்டாம்

சாகும் வரைக் காத்திருப்பவர்கள்

கடைசியில் அங்குதான் தள்ளி விடுவார்கள்

முன்னோட்டமாகவோ முன் தயாரிப்பாகவோ

ஒரு குழியில் விழுந்து எழுந்து விடுவது நல்லது

எல்லார்க்கும் ஒரு குழி இருக்கிறது

ஒரு ஜீவன் பிறக்கும் போதே

ஒரு குழி வெட்டப்பட்டு விடுகிறது

மற்றும் மனிதர்கள் பலரும்

பல குழிகள் வெட்டி வைத்தும் காத்திருக்கிறார்கள்

எந்தக் குழியாக இருந்தாலும்

விழும் குழி நமக்குப் பிடித்த குழியாக இருக்க வேண்டும்

பார்த்துக் கொள்ளுங்கள் அல்லது பார்த்து விழுங்கள்

*****