காலண்டரைப் பொருள் கொள்ளுதல்

காலண்டரைப் பொருள் கொள்ளுதல்

சனிக்கிழமையை நாட்காட்டிகளில் ‘Sat’ என்று எழுதியிருக்கிறார்கள். எங்களுக்கு வினைச்சொல் பற்றி பாடம் நடத்திய ஆங்கில ஆசிரியரின கருத்துப்படி அது sit – sat – sat வரிசையில் வருகிறது. அந்த நாள் முழுவதும் உட்கார்ந்திருக்கவே வேண்டுமா? தெரிந்தவர்கள் சொல்லுங்கள்.

*****

குற்றவாளிகள் மட்டும்தான் நீதிமன்றத்துக்கு வர வேண்டும் என்று நினைத்துக் கொள்ளாதீர்கள்.

வழக்கறிஞர்களும், நீதிபதிகளும் நீதிமன்றத்துக்கு வந்துதான் ஆக வேண்டும்.

*****

விவசாயம் செய்பவர்களைப் பார்த்தால் ஆச்சரியமாக இருக்கிறது என்கிறார் நண்பர்.

வயல் வைத்திருக்கிறவர்கள் வேறு என்ன செய்ய முடியும் என்று எனக்குப் புரியவில்லை.

*****

உலகில் இரண்டு குடும்பங்கள் இருக்கின்றன.

ஒன்று என் குடும்பம்.

இன்னொன்று மனைவியின் குடும்பம்.

இந்த இரண்டு குடும்பங்களுக்கும் இடையில் நடந்த சண்டைகளைப் போல உலகப்போர்கள் கூட நடந்ததில்லை.

அமெரிக்க – ரஷ்ய பனிப்போர்கள் எல்லாம் அப்புறம்தான்.

இதனால்தான் ஓர் ஆண் ஹிட்லரைப் போலவே முசோலினியைப் போலவே இருக்க வேண்டியது அவசியமாக இருக்கிறது என்று நினைக்கிறேன்.

*****