விஷேஷ வேஷப் பிறவிகள்

விஷேஷ வேஷப் பிறவிகள்

கவிதை எழுதி

கவிஞராகத் திரிந்து கொள்

ஓவியம் எழுதும்

ஓவியராக இருந்தாலும் சரி

இசைப்பின் ஞானியாக

உரைப்பதின் வேந்தராக

எப்படியிருப்பினும் சரி

மெகா ஸ்டாராகும்

நடிகராக இருந்தாலும் சரி

எவ்வளவு கலைகள்

ஒவ்வொன்றாகச் சொல்ல

ஆய கலைகள் அறுபத்து நான்கையும் தாண்டி விட்டதால்

ஏதோ ஒன்றின் கலைஞராக

திகழினும் சரி

கலைகளை ஆளும்

அரசியல் தலையாக விளங்கினும் சரி

தலையில் கொம்பு முளைப்பதில்லை பார்

மரமேறிக் குதிக்க வாலும் முளைப்பதில்லை பார்

சிறு குழந்தையா நீ

உயரத் தூக்கி உச்சி முகர வேண்டியதில்லை பார்

எல்லாரையும் போல் உலகில் அறுநூறு கோடி பேர்

உனக்கு மட்டும் சொத்து சேர வேண்டியதில்லை பார்

வேலையில்லாமல் திரிகிறவர் இருநூறு கோடி பேர்

உன்னை மட்டும் என்னவோ

உலகம் அங்கீகரிக்கவில்லை என்று புலம்ப வேண்டியதில்லை பார்

நாய் வேஷம் போட்டுக் குரைக்கிறாய் என்பதற்காக

எங்களை ஏன் கடிபட சொல்கிறாய்

விஷேஷ வேஷப் பிறவி எடுத்த நீ

*****