கவிதையாற்றுப்படை
அநீதியைக் கண்டால் பொங்கி எழுகிறாய்
அக்கிரமங்களைக் கண்டால் நரம்பு துடிக்கிறது
லஞ்சம் ஊழல் என்றால் நெருப்பாகி எரிகிறாய்
தவறுகளைத் தட்டிக் கேட்க வேண்டுமென்று
இன்ஜின் வேகத்தில் இதயத்தைத் துடிக்க செய்கிறாய்
நீ பாட்டுக்கு நீ செய்வதுதான் சரியென்று
செய்து விட்டு வீடு திரும்புகிறாய்
நாங்களன்றோ இரத்த அழுத்தம் பார்த்து
மாத்திரை வாங்கி வந்து போட வைத்து
அவ்வபோது இசிஜிக்கு ஏற்பாடு செய்து
நடுராத்திரியில் டாக்சியில் டாக்டரை வரவழைத்து
எதுவும் முடியாத போது ஆம்புலன்ஸில் ஏற்றி
பணிவிடை பணிக்கைகள் சிரம பரிகாரங்கள் பண்ணி
அழுது புலம்பி ஏதேதோ அரற்றி
ஊரார் கேட்பதற்கு உளறிக் கொட்டி
எதுவும் செய்ய முடியவில்லை என்றால்
பேசாமல் இரேன்
நடப்பவை எல்லா காலமும் நடந்து கொண்டுதான் இருக்கின்றன
முடிந்தவர்கள் முடிந்ததைச் செய்வார்கள்
முடியுமானால் சில நாட்கள்
கவிதைகள் எழுதுவதை நீயேன் நிறுத்திப் பார்க்கக் கூடாது
எதையாவது வாசிக்க அலைபவர்கள்
கொஞ்ச காலம் நிம்மதியாக இருந்து தொலையட்டும்
நாங்களும்தான்
*****
No comments:
Post a Comment