நம்பிக்கையை வைத்துப் பிழைப்பவர்கள்
நம்பிக்கை இல்லாமல் வாழ முடியாது என்கிறார்கள்
அதென்ன புதிதாக நம்பிக்கையோ
உயிர் இல்லாமல்தானே வாழ முடியாது
காற்றைக் கிழி
அவமானங்களை அழி
மலையை உடை
சிகரத்தை அடை
கடலைத் தகர்
உலகைத் தூக்கு
வானத்தை அள
தடைகள் பல
மேகத்தைத் தாண்டிக் குதி
வெற்றிதான் விதி
என்று எவ்வளவோ சொல்கிறார்கள்
கழைக்கூத்தாடி வித்தைகள் போல்
மேஜிக் செய்பவரின் ரகசியங்கள் போல்
மந்திரவாதியின் தந்திரங்கள் போல்
அவர்கள் இதில் எதைச் செய்தார்களோ
பிழைப்பிருந்தால் பிழைத்திருந்தால் வாழப் போகிறோம்
காற்று பாட்டுக்கு காற்று
மலை பாட்டுக்கு மலை
கடல் பாட்டுக்கு கடல்
சிகரம் பாட்டுக்கு சிகரம்
அதது பாட்டுக்கு அதது
இருந்து விட்டுப் போகிறது
நாம் பாட்டுக்கு நாம்
இருந்து விட்டுப் போகிறோம்
உசுப்பி விட்டு உயிர்க்கொலை புரியாமல் இருந்தால் சந்தோஷம்
உங்கள் நம்பிக்கைகளை நீங்களே எடுத்துச் செல்லுங்கள்
ஒருவர் நம்பிக்கையை வைத்து இன்னொருவர் என்ன செய்ய முடியும்
அவரவர் தேவைக்கு அவரவர் அறிவும் உணர்வும் இயங்க
அவரவரிடமிருந்து பெற்றுக் கொள்ள ஆயிரம் இருக்க
அவரிடம் இருப்பதைப் பிடுங்கி அன்றோ
அவரிடமே கொடுக்கிறீர்கள் நீங்கள்
*****
No comments:
Post a Comment