மெல்ல கொளுத்தும் திரை வானம்

மெல்ல கொளுத்தும் திரை வானம்

கொளுத்தும் கோடையில்

மின்வெட்டுப் போக மற்ற நேரங்களில்

பனிமலையில் ஆடும்

நாயகனையும் நாயகியையும்

காட்சித் திரையில் பார்த்துக் கொண்டிருக்கிறேன்

உள்ளுக்குள் புழுங்கும் வெக்கை புரியாது

கொஞ்சூண்டு ஆடையில்

பனிமலையில் ஆடும் நாயகிக்காக

உருகிப் போகிறாள் மனைவி

கோர்ட் சூட்டோடு சதா சர்வ காலமும்

நடந்து கொண்டிருக்கும் நாயகனைக்

கற்பனையில் எண்ணிய படி

நீரருந்தும் காலம் உணவருந்தும் காலம்

உறங்கும் காலம் கழிவறைக்குச் செல்லும் காலம் குறித்து

நினைத்து நினைத்து வேர்த்துப் போகிறேன் நான்

தண்ணீர் லாரி வந்து நின்று சத்தம் எழுப்பும் போது

நாயகன் சண்டைக் காட்சிக்குத் தயாராகி விடுகிறான்

நாயகி மயக்கம் போட்டு விழத் தயார் ஆகிறாள்

ஒரு குடம் தண்ணீரோடு திரும்பி வரும் போது

கிளைமாக்ஸ் காட்சியைக் காட்டிக் கொண்டிருக்கும் திரை

*****