குற்றாலக் குளியலஞ்சி

குற்றாலக் குளியலஞ்சி

குற்றாலம் சுற்றுலா என்றார்கள்

எல்லாரும் போகும் போது

நாம் மட்டும் போகாமல் இருப்பதெப்படி

ஐந்து சீட்டு பிடித்துக் கொடுத்தால்

ஒரு சீட்டு இலவசம் எனும் போது

ரொம்ப பெரிய ஷவர் பாத்

மக்கள் குளித்து பல நாட்கள் ஆனது போல

குளிக்கிறார்கள் குளிக்கிறார்கள்

குளித்துக் கொண்டே இருக்கிறார்கள்

ஆயில் பாத் வேண்டுமா என்றார்கள்

எண்ணெய் தேய்த்துக் குளித்தால்

சளி பிடிக்கும் என்றதும் ஓடி விட்டார்கள்

குற்றாலம் வந்தால் அருவியில் குளிக்காமலா

என்று ஆளாளுக்கு வற்புறுத்தினார்கள்

வேற்றூர் தண்ணீர் ஒத்துக் கொள்ளுமா என்றால்

அதற்காகக் குளிக்காமலா என்றார்கள்

நான்கு நாட்களுக்கும்  சேர்த்து

நான் குளித்ததை அவர்களுக்கு ஏன் சொல்ல வேண்டும்

ஐந்து பேர் குளித்தால்

ஒருவர் குளிக்க வேண்டாம் என்றதும்

ஒன்றும் சொல்லாமல் ஒதுங்கிக் கொண்டவர்கள்

இருக்கையிலும் நடக்கையிலும் அப்படியே நடந்து கொண்டார்கள்

நல்லதாகப் போயிற்று

நெருக்கம் இல்லாமல்

இறுக்கம் இல்லாமல்

கசகசப்பு இல்லாமல்

குளிக்காமல் இருப்பதிலன்றோ இருக்கிறது

குற்றாலம் சுற்றுலாவின் ரகசியம்

*****