பரபரக்கும் ஊடகங்கள்

பரபரக்கும் ஊடகங்கள்

பரபரப்பிற்காகச் சாகடிக்கிறார்கள்

இன்னும் சாகவில்லை என்று தெரிந்ததும்

தவறுக்காக வருத்தம் தெரிவிக்கிறார்கள்

எதிர்ப்புகள் அதிகமானால்

மன்னிப்பு கேட்கிறார்கள்

அரைக்கம்பத்தில் கொடி பறக்கும்

அவலத்தைப் பரபர செய்தியாக்கிப் பார்க்கிறார்கள்

அமைதியாக நடக்குமென்றால்

அதைச் செய்தியாக்குவது கடினமென்று

கலவரத்தைத் தூண்ட முடியுமா என்று பார்க்கிறார்கள்

கலவரத்தைத் தூண்டுபவர்கள்

அமைதியாக இருப்பதைப் பார்த்து கலவரமாகிறார்கள்

குளிர்சாதன அறை வியர்க்கும் அளவுக்கு

மூளையைக் கசக்கிப் பிழிந்து

பரபரப்பைப் பிரசவிக்கப் பார்க்கிறார்கள்

ஓர் அறுவை சிகிச்சையின்றி

எதுவும் சாத்தியமாகாது என்று புலப்பட

தீவிர சிகிச்சைப் பிரிவில்

தலைவர் அவர்கள்

பிழைத்துப் பிழைத்துச் செத்துக் கொண்டிருப்பதாகச்

செய்தி வெளியாகிறது

சிறிது நேரத்தில் செய்தி திருத்தப்பட்டு

தலைவர் அவர்கள்

செத்துச் செத்துப் பிழைத்துக் கொண்டிருப்பதாகச்

செய்தி வெளியாகிறது

*****