வெயிலன்றி விளையாட்டேது

வெயிலன்றி விளையாட்டேது

ஏனிந்த வெயில் இப்படி அடிக்கிறது

எத்தனை நாள் கோபம் என்ற கணக்கு

எனக்கு ஏதும் தெரியவில்லை

ஊட்டி கொடைக்கானல் சுவிட்சர்லாந்து

போகாது இந்த வெயில் என்கிறார்கள்

நாம் மட்டும் இளிச்சவாயர்களா என்றால்

நம்மைத்தான் பிடித்திருக்கிறதாம் இந்த வெயிலுக்கு

போன வருடம் வந்த போதே

அடித்துத் துரத்தியிருக்க வேண்டும் என்றால்

வந்தாரை வாழ வைக்கும் தமிழகத்தில்

அப்படியெல்லாம் செய்திட முடியாது என்கிறார்கள்

சரி அடித்து விட்டுப் போகட்டும்

ஐஸ்கிரீம் கூல் டிரிங்க்ஸ் ஏதும்

கேட்காமல் இருந்தால் சரி

வற்றல் வடகம் போட்டு

வெயிலில் குழந்தைகளுக்கு விளையாட்டுக் காட்டுங்கள்

ஒரு கிரிக்கெட் மட்டையும் பந்தையும் கொடுத்தால்

வெயிலோடு சேர்ந்து விளையாடிக் கொள்வார்கள்

பெரியவர்கள் தண்ணீர் பஞ்சம் கருதி

வியர்வையில் குளித்துக் கொள்ளலாம்

வெயில் நல்லது

அம்மன் கோயில் கூழ் குடிக்கலாம்

கொடும்பாவி கட்டி இழுக்கலாம்

சர்பத் கடைகள் போட்டால் நல்ல லாபம் பார்க்கலாம்

பள்ளிகளுக்குக் கோடை விடுமுறை விடலாம்

கனமழை என்றால் ஒரு நாள் விடுமுறை

கனவெயிலுக்குத்தானே ஒரு மாத விடுமுறை

இத்தியாதிகள் இத்தியாதிகள் இப்படி பல மேலும்

எலுமிச்சம் பழங்களை நல்ல விலைக்கு விற்கலாம்

வெயிலின்றி இதெல்லாம் செய்வதேது

*****