பேசத்தான் அழைத்தார்

பேசத்தான் அழைத்தார்

என்னவோ பேசலாம் வா என்றார்

ஏதேதோ பேசினார்

அமெரிக்காவைக் குறை சொன்னார்

ரஷ்யா மேலும் தவறிருப்பதாகச் சொன்னார்

விலைவாசி சொல்லிக் கொள்ளும்படி இல்லை என்றார்

தலைவர்கள் இப்படி ஊழல் செய்தால்

நாடு எப்படி தாங்கும் என்றார்

தான் ஒரு நாள் உலகின் அதிபர் ஆனால்

எல்லாம் சரியாகும் என்றார்

அப்படி ஒரு பதவி இல்லை என்றதும்

ஒரு நாள் பிரதமர் ஆனால் என்றார்

அப்படி ஒரு படம் வரவில்லை என்றதும்

ஒரு நாள் முதல்வர் கூட போதும் என்றார்

அணு ஆயுதப் பெருக்கம் பாலிதீன் பிரச்சனைகள்

சாக்கடையாகி விட்ட ஆறுகள் பற்றியும்

சொல்லிக் கொண்டு போனார்

ஒவ்வொன்றையும் சொல்லும் போதும்

குரலில் அப்படி ஒரு கம்பீரம்

சரிதான் விடை பெறலாம் போ என்ற போது

மெல்லிய குரலில்

மகளுக்கு வயது நாற்பத்திரண்டு ஆகிறதென்றும்

மாப்பிள்ளை ஒண்ணு பார்த்தலாம் தேவலாம்

என்று முடித்துக் கொண்டார்

*****