நேரம் அங்கோ இங்கோ எங்கோ இருக்கிறது

நேரம் அங்கோ இங்கோ எங்கோ இருக்கிறது

கொழுப்பெடுத்தவள் என்ற போது

நல்ல கொழுப்பைச் சொன்னாரா

கெட்ட கொழுப்பைச் சொன்னாரா

சுகர் அதிகமாக இருப்பதாகச் சொல்பவர்

தேநீருக்கு இனிப்பு பற்றவில்லை என்றால்

கொடுக்கவா போகிறார்

ஆஞ்சியோ செய்து ஒரு வாரம் ஆகப் போகிறது

என்பவர் நாக்கு செத்துப் போய் விட்டதாகச் சொல்லி

அரை பிளேட் சிக்கனையும் அரை பிளேட் மட்டனையும்

பாடைக் கட்டிக் கொண்டு வரச் சொல்கிறார்

மாத்திரை மருந்துகளில்தான் ஓடுகிறது என்கிறார்

குண்டான் சோற்றை ஒரு கட்டு கட்டிக் கொண்டு

எங்கே தம்பி நேரமிருக்கிறது என்று சொல்லியபடி

நடைபயிற்சிக்கு நேரமில்லாத மாமா சீட்டாடுகிறார்

மாமி சீரியஸாகச் சீரியல் பார்க்கிறார்

வாடகைப் பணம் நான்காயிரம் வந்ததும்

புல் பாடி செக்கப் செய்யப் போவதாகச் சொல்கிறார் ஓனர்

இவர்களில் யார் யாரைச் சந்தித்தாலும்

நல்லா இருக்கீங்களா என்று கேட்டுக் கொள்ளும்

சம்பிரதாயத்தை மட்டும் இன்னும் மாற்ற வில்லை

சும்மா கேட்பதில் காசுக்கென்ன பஞ்சம் வந்து விடப் போகிறது

*****