தண்டனைகள் வீணாகக் கூடாது

தண்டனைகள் வீணாகக் கூடாது

அக்கா தங்கையோடு பிறக்கவில்லையா என்கிறார்கள்

செருப்பால் அடிப்பேன் என்கிறார்கள்

மானம் வெட்கம் ரோசமில்லையா என்கிறார்கள்

சோற்றில் உப்பிட்டுச் சாப்பிடாததைப் போலப் பேசுகிறார்கள்

காவல் நிலையத்தில் புகாரளித்து

வாரா வாரத்துக்குக் கையெழுத்து இட வைத்து விடுகிறார்கள்

அண்ணன் தம்பிகளை விட்டு

அடிப்பவர்களும் இருக்கிறார்கள்

ரௌடிகளை விட்டுத் தாக்குபவர்களும் இருக்கிறார்கள்

தெருவே திரண்டு வந்து

மரத்தில் கட்டி வைத்து

உரித்து எடுப்பவர்களும் இருக்கிறார்கள்

காறித் துப்புபவர்கள் சிறுநீர் கழிப்பவர்களும் இருக்கிறார்கள்

அச்சச்சோ

ஒரு காமாந்தகனாக வாழ்வதுதான் எவ்வளவு கஷ்டம்

அதிர்ஷ்டவசமாக

காமாந்தகனை நேசித்துத் திருத்தி விடும் பெண்களும் இருக்கிறார்கள்

எல்லா காமாந்தகர்களுக்கு அப்படி வாய்த்து விடுமா என்ன

காமாந்தகர்களாக இல்லாமல் இருப்பது நல்லது என்றால்

சொல்வது கேட்டுத் திருந்தி விட்டால்

அவ்வளவையும் செய்து ரசிக்க

உங்களுக்கும் வாய்ப்பற்றுப் போய் விடும்தானே

உருவாக்கி வைத்திருக்கும் தண்டனைகளை நாம்தான் என்ன செய்வது

*****