அலையுதிர் காலம்

அலையுதிர் காலம்

உன் விலாசம் தேடி

ஒரு காலத்தில் அப்படி அலைந்திருக்கிறேன்

நீ செல்லும் அத்தனை இடங்களும் அத்துபடி

ஒரு நாள் விடாது செல்லும் இடமெல்லாம்

நிழல் போலவோ நாயைப் போலவோ

எப்படிச் சொல்வதென்று தெரியவில்லை

அப்படிப் பின் தொடர்ந்திருக்கிறேன்

நீ சிந்திப் போகும் பூக்களை

உனக்குத் தெரியாமல் குப்பைத் தொட்டி சேராது

வாசம் சோராது காத்திருக்கிறேன்

உனக்கென்ன தெரியும்

நீ வீசி எறியும் நாப்கின்களைத் தேடி அலைந்திருக்கிறேன்

காலம் ஓடி விட்டது

அண்மையில் உன் விலாசம் சொன்னான் ஒருவன்

தெரிந்த இடம்தான்

விசாரிக்காமல் வந்து விடுவேன்

கால் நோவாக இருக்கிறது

அத்துடன் உனக்கு இரண்டு பிள்ளைகள்

ஆஜானுபாகுவாக இருப்பதாகக் கேள்விப் பட்டேன்

என் வாழ்த்துகளை விலாசம் சொன்னவனிடமே

சொல்லி அனுப்பி விட்டேன்

நேரம் இருந்தால் வாழ்த்துகள் கிடைத்த செய்தியை

கொஞ்சம் அலைந்து சொல்லி விட்டுப் போ

உனக்காக நான் அலைந்த அலைச்சல் கொஞ்ச நஞ்சமல்ல

*****