காருண்யம் தெரிந்த மனிதர்கள்

காருண்யம் தெரிந்த மனிதர்கள்

சுற்றி சுற்றிக் கொட்டுகிறார்கள்

குப்பைத் தொட்டியில் கொட்ட அவ்வளவு பயம்

கேட்டால் குப்பைத் தொட்டி

ஓர் அடையாளம் மட்டும் என்கிறார்கள்

நல்லவேளை குறியீடு என்று சொல்லாமல் விட்டார்கள்

குப்பைத் தொட்டிக்குள் இருப்பது குறித்து

ஓர் ஆராய்ச்சி செய்யலாம்

அவ்வளவு விவரங்கள் தகவல்கள் இருக்கின்றன

தெருநாய்களின் குட்டிகள் சில நாளும்

வீட்டுக்காரர்களை நம்பாத

வீட்டுப் பூனைகளின் குட்டிகள் சில நாளும்

மனித நாய்களோ மனிதப் பூனைகளோ

எப்படிச் சொல்வதென்று தெரியாது போனாலும்

அவர்களின் பிள்ளைகள் சில நாளும் கிடக்கின்றன

குப்பைகளைக் குப்பைத் தொட்டியில் போடாமல்

தொட்டி சுற்றிப் போடுவதற்கு

காரணங்கள் இருக்கின்றன

காருண்யம் தெரிந்த மனிதர்கள் வேறென்ன செய்வார்கள்

*****