தலைவரைப் பாடுவோம்

தலைவரைப் பாடுவோம்

சூரியரே இதயத்துக்கு வந்த சூரியரே

சந்திரரே பூமிக்கு வந்த சந்திரரே

உம் பேரையும் வாழ்க என்ற வார்த்தையையும் முழங்கி

பலம் பல பல கண்டோம்

உம் உரை கேட்டு

களம் பற்பல பற்பல கண்டோம்

கடல் போன்ற உன் உள்ளத்தில் நீந்துகின்ற

மீன்கள் எனப் பாடிச் சென்றோம்

ஓயாத கடலலைப் போல உழைப்பதாக

ஊர் முழுவதும் உரக்கச் சொன்னோம்

தடைகளை உடைப்பதில்

உன்னைப் புயல் என்றோம்

பகையைச் சிதைப்பதில்

உன்னை ஊழித்தீ என்றோம்

வாரி வழங்குவதில்

பாரியின் பிள்ளை என்றோம்

கொடுத்துச் சிவப்பதில் உன் கைகள்

செந்தாமரையோ செவ்வண்ண ரோஜாவோ

என மயங்கி நின்றோம்

இவ்வளவு எண்ணியும் முழங்கியும் பார்

இன்னும் வந்து சேரவில்லை பார்

ஒரு குவார்ட்டர் பிராந்தியும் பிரியாணியும்

*****