திணை மயக்கம்

திணை மயக்கம்

இந்த நகரத்தில் நானிருக்கும் திணை

இதுவென்று சொல்ல இயலாது

குறிஞ்சியின் மலைமுகட்டைப் போலிருக்கும்

அபார்ட்மெண்டின் உச்சியில் வசிக்கிறேன்

முல்லையின் காடுகளைப் போலிருக்கும்

காங்கிரீட் வனங்களிடையே உலவுகிறேன்

தினம் விதைத்து முளைத்துக் கொண்டிருக்கும்

மருத நில வயல்களைப் போல

வளர்ந்தோடிக் கொண்டிருக்கும்

வாகனங்களிடையே ஊர்ந்து போகிறேன்

நெய்தல் நிலப் பரப்பில் வீசும்

கவிச்சி வாடையைப் போல

சாக்கடைக் கடல் புரளும்

அலைக்கரை பரப்பில் பயணிக்கிறேன்

செயின் பறிப்பு பீரோ புல்லிங்

சைபர் குற்றங்களைப் பார்க்கையில்

பாலைநிலப் பரப்பைக் கடக்கையில் எழும்

கள்வர்களின் அச்சத்தினூடே கடக்கிறேன்

*****

நன்றி : ஆனந்தவிகடன் இதழ் (22.06.2022) பக்கம் : 22