இதுவில்லை உலகம்
காட்டுக்குள் அழைத்துச் சென்று
சிங்கத்தையோ புலியையோ
காட்ட முடியாமல்
உயிரியல் பூங்காவுக்கு அழைத்துச் செல்கிறேன்
வீட்டுக்கருகிலோ குளக்கரையிலோ
பறவைகளைக் காட்ட முடியாமல்
சரணாலயங்களுக்கு அழைத்துச் செல்கிறேன்
நிறைந்தோடும் நதியில்
துள்ளியோடும் மீன்களைக் காட்ட முடியாமல்
கண்ணாடித் தொட்டிக்குள் வளர்பவைகளைக் காட்டுகிறேன்
புறம்போக்கு நிலங்களில் மண்டிக் கிடக்கும்
செடி கொடி மலர்களைக் காட்ட முடியாமல்
பூங்காக்களுக்கும் நர்சரிக்கும் அழைத்துச் செல்கிறேன்
பிள்ளைகளுக்குக் காட்டும் இதுதான் உலகம் என்பது
இதுவில்லை என்பதை எப்படிக் காட்டுவேன் நான்
*****
No comments:
Post a Comment