இருப்பதைக் காட்டும் இந்த வாழ்வு
விடுமுறை நாளில்
தியேட்டர் பீச் என்று சென்று
ஓய்வு கொள்ள முடியவில்லை
கோடை வாட்டும் பொழுதுகளில்
ஊட்டியோ கொடைக்கானலோ
வாசம் கொள்ள முடியவில்லை
கண்காட்சி பொருட்காட்சி என்று
ஊர் திரண்டு செல்லும் போது
சென்று திரள நேரம் வாய்ப்பதில்லை
கல்யாணம் கருமாதி சாவு
மஞ்சள் நீராட்டு வளைகாப்பு காதணி விழா என்று
ஓடிக் கொண்டிருக்கும் நதி போல ஓடுவதன்றி
தேங்கி நின்று ரசிக்கும் கடல் போல்
நின்று நிதானித்து நான்கு வார்த்தைகள் பேசும்
வாழ்க்கை வாய்க்கவில்லை
என்றாலும்
பெருங்கூட்டப் பேருந்தில்
சிறு பொழுது உட்கார இடம் கிடைக்கையில்
வழியும் வியர்வையைத் துடைத்தபடி
குளிரூட்டப்பட்ட கடையொன்றில் நுழைகையில்
பிள்ளைகள் கேட்பார்களென்று
சந்தைக்கடைத் தெருவில் தேடியலைந்து வாங்குகையில்
சாப்பிட்டு நான்கு நாட்கள் ஆகி விட்டதென்று
கையேந்துபவரிடம்
பத்து ரூபாயைக் கொடுத்து
அவர் சொல்லும் கேட்கும் பொழுதுகளில்
இல்லையென்று சொல்லாது
இல்லாதிருப்பது ஏதென்பதைக் காட்டுகிறது
இந்த வாழ்வு
*****
No comments:
Post a Comment