விபத்துக்குப் பின் நேரும் விபத்து

விபத்துக்குப் பின் நேரும் விபத்து

கொஞ்சம் மெதுவாகச் சென்றிருந்திருக்கலாம்

கொஞ்சம் காலம் தாழ்த்தியிருக்கலாம்

இரண்டும் நிகழாமல் போனதில்

இரண்டு வாகனங்களும் ஒன்றோடொன்று உரசி நின்றன

உரசுவதற்கு சில நொடிகளுக்கு முன்

மோதலை உணர்ந்த ஓட்டிகளில் ஒருவர்

வாகனம் வெடித்துச் சிதறுவதாய் நினைத்திருக்கலாம்

மற்றொருவர் நிதானமாய் உரசலைத் தவிர்க்க முனைந்திருக்கலாம்

உரசிய வாகனங்கள் கீறிச்சிட்டு நின்ற பின்

வாகன காயங்கள் பெரிதாகத் தெரியவில்லை யாருக்கும்

ஓட்டிகளில் ஒருவர் மாரடைப்பில்

வியர்த்து விதிர்விதிர்த்து அமர்ந்திருந்த போது

தவிர்க்கப்பட்ட விபத்திலிருந்து தப்பியவரை

அவசர அவசரமாய் ஏற்றியபடி

அவர் சென்ற வாகனத்தினும்

வேகமாய் விரைந்து கொண்டிருக்கிறது ஆம்புலன்ஸ்

விபத்துக் குறித்த கற்பனையை

ஒரு கணம் தவிர்த்திருக்கலாம்

அந்த ஓட்டிகளில் ஒருவர்

*****