எப்போதோ கேட்கும் பாடல்கள்

எப்போதோ கேட்கும் பாடல்கள்

இந்தப் பாடல்கள் தமக்குத் தாமே மெட்டமைத்துக் கொண்டவை

தமக்குத் தாமே வரிகளை உருவாக்கிக் கொண்டவை

சுதந்திரமான பாடல்கள்

யாருடைய கைத்தட்டல்களையும் எதிர்பார்க்காதவை

யாருடைய ரசனையையும் கோராதவை

காற்றின் போக்கில் கலந்து

காற்றோடு கரைந்து போகுபவை

தேடி அலைபவர்களின் காதுகளில்

அப்பாடல்கள் எப்போதோ ஒலிக்கின்றன

பாடல்கள் தரும் மயக்கத்தில்

லயித்து நிற்பவர்கள் அந்தக் கணத்தில் உறைந்து விடுகிறார்கள்

ஒரு கணத்தில் பிறந்து மறுகணத்தில் மறைந்து விடும் பாடல்கள்

திடீரெனப் பெய்யும் மழையில் நனைவதைப் போல

விழிப்போடு இருப்பவர்களால் கேட்கப்படுகிறது

விரும்புபவர்கள் காத்திருக்கலாம்

விருப்பங்களைத் தொலைத்தவர்கள்

கேட்கின்ற பாடல்களைக் கேட்டுக் கொண்டு

நகர்ந்து கொண்டிருக்கலாம்

அதற்காக மட்டுமல்லாது எதற்காகவும்

அந்தப் பாடல்கள் வருத்தப்படுவதாகத் தெரியவில்லை

*****