பதுங்கிக் கொள்ளும் நெருப்பு

பதுங்கிக் கொள்ளும் நெருப்பு

தயாரிப்பைக் கைவிட்டு விட்ட ஒரு நிறுவனத்தின்

பழம்பெரும் இரு சக்கர வாகனத்தில் இயங்கிக் கொண்டிருக்கிறோம்

நானும் அந்த முதியவரும்

அந்த முதியவரும் காலம் கைவிட்டு விட்ட

பொருளைப் போலத்தான் இருக்கிறார்

யார் எதைக் கைவிட்டாலும்

இருப்பு இருக்கும் வரை ஓடத்தானன்றோ வேண்டியிருக்கிறது

வாகனச் சத்தம் அகோரமாய் இருப்பதாகத் திட்டியபடி செல்பவர்கள்

முன்னகர்ந்து விரைந்து கொண்டிருக்கிறார்கள்

வாகனச் சத்தம் காற்றுப் பெருவெளியில் தேய்ந்து நிற்கும் போது

எரிபொருள் தீர்ந்திருப்பது பிரபஞ்சத்துக்குப் புரிகிறது

எங்கிருந்தோ உதவிக்கென வருபவர்

தன்னுடைய வாகனத்திலிருந்து

கொஞ்சம் எரிபொருளைத் தந்து அத்துடன்

கொஞ்சத்தினும் கொஞ்சமாக தீப்பொறியினையும்

தந்து விட்டுப் புறப்படுகிறார்

பற்றி எரியத் தொடங்கும் எரிபொருளுடன்

எங்கள் வாகனம் இயங்கத் தொடங்குகிறது

பார்ப்பவர்கள் எங்களை விநோதமாகப் பார்க்கிறார்கள்

என்றோ ஒரு நாள் எரிய வேண்டியவர்கள்தான் மனிதர்கள்

என்கிறார் பின்னால் அமர்ந்திருக்கும் முதியவர்

நெருப்பொன்றாவது தன்னைக் கைவிடவில்லை என்ற திருப்தியில்

பற்றி எறிந்த நெருப்பு

சாலையோர குளமொன்றைக் கண்டதும்

காலம் முழுவதும் எரிந்த வெம்மைக்குக் குளுமையைத் தேடியபடி

குபுக்கென்று பாய்ந்து அதன் அடி ஆழத்தில் பதுங்கிக் கொள்கிறது

வாகனத்தை நிறுத்தச் சொல்லி

நெருப்பைத் தேடியபடி குளம் முழுவதும்

தேடியபடி இருக்கிறார் முதியவர்

கரையோரத்தில் காத்திருப்பில் இயங்கியபடி

முதியவரை எதிர்நோக்கி நிற்கிறோம் நானும் வாகனமும்

*****