சேமிப்பில் உறையும் நினைவுகள்
சேமிப்பிற்கு அளவேது
கறையான்கள் தின்றது போக
மீந்திருக்கு நினைவுகள் மறதிகள்
தின்பதற்காக
சேமித்துக் கொண்டே போகும்
வழியில்
முதுமை வந்து வழிப்பறி செய்கிறது
சேமிப்பை அம்போவென்று விட்டுச்
செல்லும்
தைரியமின்றி கலங்கும் மனதுக்கு
யார் ஆறுதல் சொல்வது
ஆறுதலுக்காக நெற்றியோடு வரும்
ஒற்றைக்காசு நடுவழியில் உதிர்ந்து
ஏமாற்றுகிறது
மிஞ்சியிருக்கும் சேமிப்பை
எவரெவர் எடுத்துக் கொண்டாலும்
கைநழுவும் தருணங்களே சேமிப்பின்
குணாதிசயம்
சேமிப்பு உறிஞ்சிக் கொண்ட
பட்டினிகளுக்கும் பரிதாபங்களுக்கும்
புண்ணியம் ஒன்றே பிராயச்சித்தம்
அவரவர் சேமிப்புக் கணக்கு
ரகசியமானது
அவரவர்க்கே தெரியும் சேமித்த
பொருள்
சேமிப்பை யாரும் எடுத்துச்
செல்ல முடியாது என்பது
புண்ணிய கணக்குக்குப் பொருந்தாது
என்றோ ஒரு நாள் சோறிட்டதை
இன்றும் சொல்லிச் சொல்லி
ஒப்பித்துக் கொண்டிருக்கிறான்
காலத்தேவக் கிழவன்
*****
No comments:
Post a Comment