மனப்படகின் பயணம்

மனப்படகின் பயணம்

வார்த்தைகளுக்குக் கட்டுபடாமல் நீள்கின்றன முடிவுகள்

மனதுக்கு ஒவ்வாது கசப்பைச் சுமந்த வண்ணம் நகர்கின்ற

வாழ்க்கை நதியைத் திசை திருப்ப முடியாமல்

அல்லாடுகின்றன தள்ளாடும் நம்பிக்கைகள்

எண்ணங்களின் இழுவிசை ஒவ்வொருரையும்

வெவ்வேறு விதமாய்க் கவர்ந்திழுக்க

ஒவ்வொருவரும் ஒவ்வொருவர் மீதும் காட்ட விழையும்

அளவிடற்கரிய அக்கறையைத் தாங்க இயலாது

மிதந்தும் மூழ்கியும் மெலெழுந்தும் ஆழ அமிழ்ந்தும்

அலைவுறுகிறது பயணித்துக் கொண்டிருக்கும் மனப்படகு

பயணங்களின் முடிவில் மற்றொரு பயணம் துவங்கும் எனினும்

ஒரு பயணத்தின் இலக்கு ஒவ்வொரு பயணத்தையும்

ஒரே மாதிரியாய் மாற்ற முனைகிறது

ஒவ்வொரு பயணமும் ஒவ்வொரு மாதிரியானது என்பதறியாது

ஒரு பயண அனுபவம் எல்லா பயணங்களையும்

ஒருமையாய்த் தீர்மானித்து அதிகாரமிடுகிறது

ஒரு பயணத்தில் நேர்ந்து விடும் விபத்து

ஒவ்வொரு பயணத்தையும் அதீத பயத்தோடு துவக்கச் செய்கிறது

நதியும் பயணமும் யாருக்கும் கட்டுப்படாமல்

நிகழ்ந்து கொண்டேயிருக்கின்றன

ஏதோ ஒன்றுக்குக் கட்டுப்பட்டும்

பின் யாதொன்றுக்கும் கட்டுப்படாமலும்

திசை தெரிந்தும் திசை தப்பியும்

பலவிதமாய்ப் பயணித்துக் கொண்டிருக்கிறது மனப்படகு

*****