வெண்சுருட்டின் புகைமிகு வாசம்
பெட்டிக்கடை முழுவதும் நிறைந்திருக்கிறது
வெண்சுருட்டின் புகைமிகு
வாசம்
குழந்தைகள் மிட்டாய்கள் வாங்குவதற்காய்
நிற்கின்றன
முதியவர் ஒருவர் வெற்றிலைப்
பாக்கிற்காய்க் காத்திருக்கிறார்
தாக சாந்தியின் பொருட்டு
தண்ணீர் போத்தலுக்காகக் காத்திருப்பவரும்
அங்கிருக்கிறார்
குளிர்பானம் வேண்டி நிற்பவரும்
கால் கடுப்பைப் பொறுத்துக்
கொண்டிருக்கிறார்
பெட்டிக்கடைக்காரரின் இரு
கரங்கள் பலவிதமாய்ச் சுழல்கின்றன
தகிப்பில் ஒவ்வொருவரும் ஆசுவாசம்
இழக்கின்றனர்
எல்லார் தகிப்பையும் உள்ளிழுத்துக்
கொண்டு
புகை விடும் வெண்சுருட்டு
ஊதுபவர் ஆசுவாசம் கொள்கிறார்
அனைத்தையும் உள்ளிழுத்துக்
கொண்டு
ஆசுவாசம் கலையாமல் ஒவ்வொருவர்
தேவைக்காகவும்
ராட்டினக் கால்களில் சுழல்கிறார்
பெட்டிக்கடைக்காரர்
*****
No comments:
Post a Comment