கனவும் கனவு நிமித்தமும்

கனவும் கனவு நிமித்தமும்

கனவில் கொலை செய்தவரை

நேரில் பார்க்கையில் பீதியாய் இருக்கிறது

சங்கதி வெளியானால் நிலைமை என்னாவது

நீங்களும் என்னைக் கனவில் கொன்று விடுங்கள் என்று

அவரிடம் சென்று மன்றாடுகிறேன்

புரியாமல் விழிப்பவர் கொஞ்சம் நிதானித்து

நெற்றியைச் சுருக்கியபடி பைத்தியம் எனக் கடந்து செல்கிறார்

யாருக்குத் தெரிந்தால் என்ன

தெரியாமல் இருந்தால் என்ன

கடவுளுக்குத் தெரியும்

கடவுள் என்னை நரகத்தில் தள்ளுவார் என நினைத்தால்

அற்றை நாள் கனவு சம்போகங்களால் நிறைகிறது

சம்போகம்தான் நரகமோ என்னவோ

சம்போகித்தவரை நேரில் பார்க்கையில்

பேரதிர்ஷ்டமும் பெருமகிழ்வுமாய் இருக்கிறது

அவரிடம் சென்று எப்படிச் சொல்வது

உங்கள் கனவில் வரலாமா என்று கேட்டு வைக்கிறேன்

கொன்றாலும் கொன்று விடுவேன் என்று

புன்னகைத்தபடிச் சொல்லிச் சென்றவரை

நிலைகுத்திய கண்களோடு கொலையுண்டவனைப் போல

கனவுகள் உறைந்த கால வெளியில் பார்த்தபடி நிற்கிறேன்

*****