சொல் புனைவு

சொல் புனைவு

மனிதரைச் சுற்றி

எல்லாம் இரண்டிரண்டாக இருக்கிறது

இரண்டுக்கும் சேர்த்து

மனிதருக்குச் சொல் வேண்டும்

ஒரு வார்த்தையில் கடவுளைப் படைத்தான்

இன்னொரு வார்த்தையில் சாத்தானைப் படைத்தான்

மனிதனுக்கு இரண்டு சொற்கள்

தேவையாக இருக்கின்றன

கடவுள் சாகும் நாளில் சாத்தான் இறந்து படுவாராக

மனிதருக்குக் கோபம் வருகிறது

கடவுளைத் தோற்றுவித்து சாத்தானைப் பிரசவித்ததாகச்

சொல்கையில்

கடவுள் என்ற சொல்லில் கருணையையும்

சாத்தான் என்ற சொல்லில் குரூரத்தையும்

பெயர்த்து வைத்த மனிதர்கள்

எல்லாம் தங்களது சொல்புனைவு என்பதை

காலப்போக்கில் எப்படியோ மறந்து போயினர்

மனிதர்கள் கடவுளை வணங்குகிறார்கள்

சாத்தானை வெறுக்கிறார்கள்

மனிதர்க்கு எப்படிச் சொல்வது

அவர்கள் உருவாக்கிய சொல்புனைவிலன்றி

கடவுளும் இல்லை சாத்தானும் இல்லை என்பதை

*****