மிச்சமிருக்கும் மனிதம்
பல வீடுகள்
கட்ட முடியாத ஆற்றாமை
வாடகை வீடுகளில் தீர்கின்றன
வாடகை வீடென்றால் என்ன
அவைகளும் வீடுகளே
வீடு மாறிச் செல்லும் கொடுப்பினையை
வீடற்ற நிர்கதியை
வாடகை வீடுகளே தருகின்றன
ஹவுஸ் ஓனர்கள் ஒண்டியிருக்காத
வாடகை வீடுகள் அபூர்வமாய் வாய்க்கின்றன
அநேக வாடகை வீடுகள்
நகரங்களின் குடியிருக்கின்றன
மிகப் பெரும் வீடு கட்டி
குடியிருக்கும் நல்லவரை விட
சிறுவீடு கட்டி அதை ரெண்டாய்ப் பிரித்து
வாடகைக்கு விடும் சிடுமூஞ்சிக்காரர்
ஆகச் சிறந்த நல்லவராய்ப் படுகிறார்
வாடகைப் பாக்கிகளில்
கொஞ்சம் ஒட்டியிருக்கவே செய்கிறது
மிச்சம் இருக்கும் மனிதம்
*****
No comments:
Post a Comment