நழுவி விழும் துக்கம்

துக்கம்

துக்கம் தீர

கோயிலுக்குள் போனவரின்

கண்களுக்குள் யானை

தீர்க்க முடியாத

துக்கத்தைச் சுமந்தபடி

கோயிலுக்குள்

யானையின் கண்களுக்குள்

காடு

*****

நழுவி விழுதல்

சொல்லும் போது சொல்வதற்கேற்றவாறு

நழுவி விழுந்தால்

சொல்வது சரியானது

நழுவி விழாமல் போனால்

சொன்னது எவ்வளவு தவறானது

சரியோ தவறோ

மெய்யோ பொய்யோ

மெளனத்தைப் பார்

இரண்டின் சாத்தியங்களையும் கொண்டிருக்கிறது

முடிவில் ஒரு புன்னகை

நினைத்தது போல நடந்தது என்பதைக் காட்டுகிறது

சொல்வதோ மெளனித்திருப்பதோ

அவரவர் விருப்பம்

எதிர்கொள்ளல் தவிர்க்க முடியாத திருப்பம்

*****