விரும்ப வைக்கப்படுதல்

விரும்ப வைக்கப்படுதல்

நீங்கள் இறப்பிற்குப் பின்

ஒரு மகன் செய்யும் கடமையைப் பார்க்க வேண்டும்

ஏன் ஒரு மகனைப் பெற வேண்டும்

என்பதற்கானப் பைத்தியம் அதற்குப் பின்

உங்களுக்குப் பிடிக்கும்

நீங்கள் திவசம் செய்யும் இன்னொரு நாளில்

உயிர்த்து வந்துப் பார்க்க வேண்டும்

மகள் இருக்கின்ற மகன் இல்லாத

தகப்பனாய் ஆனதற்கு நீங்கள் நொந்து போவீர்கள்

நீங்கள் ஆண் பிள்ளையை விரும்பவில்லை

விரும்ப வைக்கப் படுகிறீர்கள்

*****

கூரை வானம்

வெயிலை மறைப்பதற்காகப் போட்ட கூரை

சூரியனை மறைத்து விட்டது

மழையைத் தடுப்பதற்காகப் போட்ட கூரை

மழைநீரை மண்ணில் படாமலே செய்து விட்டது

கூரைகள் விரிந்து கொண்டே போகின்றன

வெயில் எங்கே

மழை எங்கே

ஏ.சி. கூரை வேய்ந்த அறைகளில்

மழைநீர்ச் சேமிப்பிற்கான முணகல்கள்

கேட்டுக் கொண்டிருக்கின்றன

*****