எல்லாம் வெறும் பெயர்கள்
எல்லாம் பெயர்களே
நிகழ்வதற்கு உலகம்
பெயர் சூட்டிக் கொள்கிறது
கணிப்பிற்கு உலகம்
பெயர் சூட்டிக் கொள்கிறது
மாறி நிகழும் போது
ஏமாற்றம் என கூறிக் கொள்கிறது
ஏமாந்து போகும் போது
அதிர்ஷ்டமில்லை என கூறிக் கொள்கிறது
எதிர்பார்த்ததைப் போல வெற்றி எனும் போது
ராஜதந்திரம் என கூறிக் கொள்கிறது
முடிவை அழிவு என்கிறது
மரணம் என்று கதறுகிறது
எல்லாம் வெறும் பெயர்களே
*****
நிஜமான கலைஞர் நிஜமான ரசிகர்
அழகான
பூ
ரசித்த பின்
வாடி விடுகிறது
ரசனை மட்டும் அப்படியே இருக்கிறது
கல்லில் செதுக்கி வைத்த பூவைப்
போல
பூவைக் கல்லாய் உறைய வைத்தவரோ
கல்லைப் பூவாய் நிறைய வைத்தவரோ
எவர் கலைஞர்
எவர் ரசிகர்
மீண்டும் அழகான பூ
ரசித்த பின்
வாடி விடுவதற்குள்
கண்டுபிடியுங்கள்
எவர் கலைஞர்
எவர் ரசிகர்
சுவர் இடிந்து விழும் ஓசை
கேட்டால்
நீங்களே நிஜமான கலைஞர்
நீங்களே நிஜமான ரசிகர்
*****
No comments:
Post a Comment