மறுபிறப்பின் மன்றாடிகள்
கிறிஸ்துவும் நம்பியிருப்பார்
கிருஷ்ணருக்கு அப்படியொரு கற்பனை இருந்திருக்கும்
நபிகளின் கனவும் அதுதான்
சமாதானப் பேரரசு இன்னும் உருவாகவில்லை
அவர்கள் நூல்கள் வழியாகப் போராடிக் கொண்டிருக்கிறார்கள்
அவைகள் சில நேரங்களில்
சமாதானப் புறாக்களாய்ப் பறக்கின்றன
சில நேரங்களில்
வெடிகுண்டுகளாய் வெடிக்கின்றன
குற்றங்கள் தண்டனைகளுக்கான விதிகள்
என்ன இருக்கின்றன
விதிகள் இருந்தும் என்னவாம்
கனிவாக குற்றங்களை
மன்னிப்பாக தண்டனைகளை
அணுகுவதைச் சொல்லிச் சென்றவர்கள் சென்று விட்டார்கள்
கனிவுகள் சிலுவையில் அறையப்படுகின்றன
மன்னிப்புகள் துரத்தி அடிக்கப்படுகின்றன
இன்னொரு கிறிஸ்து கிருஷ்ணா நபி
பிறந்து வரக் கூடும் என்ற நம்பிக்கையில்
குற்றங்களும் தண்டனைகளும் தொடர்கின்றன
ஒரு வேளை அவர்களின் இரண்டாம் பிறப்பு நிகழ்ந்தாலும்
அவர்களின் மூன்றாம் பிறப்பை எதிர்பார்ப்பவர்கள் அன்றோ நாம்
*****
No comments:
Post a Comment