தடையில்லாச் சான்று

 தடையில்லாச் சான்று

ரகசியமாக நடந்து செல்லும்

பூனையின் கால்களைப் பிடுங்கிக் கொண்டு

லிப்ட் மேல் ஏறுகிறது

திருடன் வருவதாக எச்சரிக்கை செய்கிறது சைரன்

பின் அதை மாற்றிக் கொண்டு

கொலைகாரன் என அலறுகிறது

எல்லாரும் ஓடி வந்து பார்க்கும் போது

ஆத்மா சாந்தியடைந்து மேலே சென்று கொண்டிருக்கிறது

கோப்பை முடிக்க வேண்டுமே என்ற கவலையோடு

காவலர்கள் வருகிறார்கள்

பிரேத பரிசோதனையை நம்பிக் கொண்டு இருப்பவர்களுக்கு

இறந்தவரின் அடையாள அட்டை எண் காணாமல் போகிறது

அட்டை எண் கிடைத்த உடன்

இறப்பிற்கான அதிகாரப்பூர்வ காரணம் வெளியாகக் கூடும்

இறுதி அஞ்சலி நிகழ்வை

தடையில்லாச் சான்று பெற்றுமுடித்துக் கொள்ளலாம்

கனத்தக் கவிதைகளுக்கு அனுமதி இல்லை

*****