சவப்பெட்டிக்குள் புன்னகை

சவப்பெட்டிக்குள் புன்னகை

சவப்பெட்டிக்குள் இருக்கும் புன்னகை

எல்லா முகங்களுக்கும் வாய்ப்பதில்லை

வாழ்நாள் முழுவதும் சிரித்திருந்தால்

சவப்பெட்டியிலும் புன்னகை நிறைந்திருக்கும்

உடையாத கனவுகள்

உறுத்தாத நினைவுகள்

இதயம் இயங்கியிருப்பது தெரிந்திருக்கக் கூடாது

இதயம் நின்றது தெரியாமல் இருப்பவர்களுக்கே

அது வாய்க்கிறது

காற்றோடு காற்றாய்ப் பறந்து போகும் மலர்கள்

சூறாவளியில் கசங்கிப் போகுமா என்ன

சவப்பெட்டியில் புன்னகை இல்லாதவர்க்கு

மாலை போட வேண்டும்

எரிப்பதற்கு எதுவும் இல்லாத இடத்தில்

நெருப்பு எதை எரிக்கப் போகிறது

சவப்பெட்டியில் புன்னகையோடு உறங்குவது பெரிய கலை

*****