எச்சரிக்கை ஒரு குழந்தை படிக்கிறது

எச்சரிக்கை ஒரு குழந்தை படிக்கிறது

ஆயா ஒரு கையால் ஒரு குழந்தையின் மலம் துடைக்கிறாள்

மறுகையால் ஒரு குழந்தையின் பசி தீர்க்கிறாள்

அதிகாலையில் எழுந்த களைப்பால்

உறங்கிக் கிடக்கும் பிள்ளைகளுக்கு

அவ்வபோது மிஸ் பாடம் கதைத்துக் கொண்டே

ரிங்கிட்டுக் கொண்டிருக்கும் செல்பேசியை

தலையில் தட்டுகிறாள்

டிக்டேஷனில் விசாரணைக் கைதிகள் போல்

குழந்தைகள் அடிபடுகின்றன

வீட்டுவேலை நினைப்பு வந்ததும்

மிஸ்கள் ஒவ்வொருவராக ஹோம் ஒர்க்கை

அள்ளி வீசுகிறார்கள்

வேனை விட்டு இறங்கியதும்

குழந்தைகைளத் தூக்கி எறிந்து விட்டு

ஹோம் ஒர்க்கை அள்ளி ஏந்திக் கொள்ளும் பெற்றோர்கள்

பெருமிதமாக உணர்கிறார்கள் என்பது புளங்காகிதம்

பிஞ்சுகள் கருகிய வாசனை கேட்கிறதா உங்களுக்கு

மூக்கை அறுத்துக் கொள்ள தயங்காதீர்கள்

யாருக்கும் காது கேட்காத சமூகத்தில்

உங்கள் அலறல் சத்தம் பாதுகாப்பாக இருக்கும்

*****