முகவர்கள் இருக்கிறார்கள் நிறுவனங்கள் இருக்கின்றன

முகவர்கள் இருக்கிறார்கள் நிறுவனங்கள் இருக்கின்றன

உங்களுக்காகக் குருதி தோய்ந்த வார்த்தையைக்

கூறாமல் இருக்கலாம்

இரத்தக் கவிச்சி அடிப்பதை தடுக்க முடியாது

உங்கள் அனுமதி கேட்பதற்கில்லை

அறுவைச் சிகிச்சைக்கான செலவு

ஒரு நன்கொடையாளருடையது

மருந்துகள் மாத்திரைகள் அனைத்தும்

மானியங்களுக்கு உட்பட்டது

உயிரைக் காப்பதும் எடுப்பதும்

காப்பீட்டின் வரம்புக்குள் நிர்ணயிக்கப்படுவது

இவ்வளவு காலம் வாழ்ந்ததற்காக

நன்றி சொல்லுங்கள்

ஒரு காகிதத்தில் கையெழுத்திட்டு

இனி வாழ முடியாமைக்காக

கருணை கொலைக்காக மனு செய்யுங்கள்

மற்றதை முகவர்கள் பார்த்துக் கொள்வார்கள்

கவலைபடாமல் உயிரை விடுங்கள்

நிறுவனங்கள் இருக்கின்றன பார்த்துக் கொள்ள

*****